OBEIKAN FILIPINO WORKERS ASSOCIATION

SALIGANG BATAS

Ang OFWA
Saligang Batas
Kasapi at Pamunuan ng OFWA
Contact Us

.

.

Panimula-PREAMBULO

 

Kami ang  mga Pilipinong Manggagawa  ng Obeikan  Investment  Group  Riyadh KSA , sa tulong  ng Poong Mapagkalinga  , sa layuning  makabuo  ng isang   samahang sasalamin sa  aming adhikain ,layunin , tunguhin , magsusulong  ng kagalingan  panlahat  mangangalaga sa aming  kapakanan  , makakaisa ng iba pang samahan, institusyon o ahensiya , pribado man  o publiko ,na papanday at maglilinang ng aming  kakayahan , ng  kabuuan ng aming  pagkatao, at  ng aming  pagiging Pilipino , sa  ilalim ng sistema  ng  pamumunong naniniwala sa  prinsipyo  ng  sama-sama  o kolektibong  pamumuno at tunay na demokrasya ay nagtatadhana  at nagpapahayag   ,   ng  Saligang Batas   na  ito.

 

 

Artikulo   I.  Opisyal na  Pangalan , Logo, Motto , Pagkakakilanlan at Tanggapan

 

Sek 1 – OFWA  o OBEIKAN  FILIPINO WORKERS ASSOCIATION, ang  opisyal na pangalan ng samahan na irerehistro at ihihingi ng pagkilala o akreditasyon sa embahada ng Pilipinas,sa Security and Exchange  Commission , sa  kumpanya at iba pang  organisasyong  nais  na magkaroon ng pagkilala sa  samahan.

   
Sek . 2 –May  opisyal na  logong  gagamitin ang  samahan sa  lahat ng  pagkakataon , mula sa Identification Card, Certificate  of Membership  , Official Paper   , banner at iba pa ang samahan.

 

Sek 3. – Kung mapagkakaisahan at mapagpasyahan ng mayorya  ng  kasapian , maaaring magkaroon ng  Motto  ang  samahan .

 

Sek.4- Tanggapan – Magkakaroon din ng opisyal na tanggapan ang samahan , ayon sa  napagkasunduan  o napagpasyahang  lugar ng   kasapi ng samahan ayon sa  umiiral na kalagayan  at pangangailangan  nito.

 

Sek. 5 – Ang opisyal na  pangalan, logo , insignia   at iba pang  pagkakakilanlan ng samahan ay tanging sa  mga opisyal na gawain  , pagtitipon  lamang maaaring gamitin  o dalhin bilang isang  buong samahan  o katawanin nito ang samahan.

 

Sek. 6 – Ang sinumang  kasapi na  gumamit ng  pangalan at kaugnay nito ,  sa alin mang  personal na  interes  na makasisira sa kanyang  iniingatang samahan ay  pagkakalooban ng pandisiplinang  hakbang na  pagtitiwalag  at pagsasauli o pagbabayad   kung  pera  o bagay ang  kinuha sa  ngalan ng samahan.

 

 

 

 

 

 

 

Artikulo II. Pahayag ng mga Simulain , Paniniwala  , Paninidigan at Tunguhin ng Samahan

 

 

SEK. 1. Ang OFWA  ay  samahang  naniniwala sa  prinsipyo ng tunay na Demokrasya – mula sa  tao  tungo sa  tao  at Sama-samang  Pamumuno . Ang pinakamataas na kapangyarihan nito ay nakasalalay sa mayorya  ng  kasapian at ang  kapangyarihan  ng lahat ng namumuno ay  nagmumula sa kasapian  nito.

 

SEK. 2. Ang Tao  bilang  pinakamataas na  nilikha  ng Diyos ay  hindi dapat nag iisa  at nilikhang  may mahalagang papel na dapat  gampanan sa  kanyang kapwa. Ang  ugnayan  ng tao ay hindi dapat matali sa sariling  pamilya lamang bagkus  palawigin upang maging  ganap ang ugnayan  niya sa  kapwa tao, bagay  ,lipunan at higit sa lahat Diyos.


Sek. 3. Naniniwala at naninindigan na ang  uring manggagawa ay may taglay na  talino  at kakayahan upang  makapag-ambag sa  pag unlad ng  lipunan, na dapat pag ukulan  ng  pansin , pagpapahalaga at tulong  ng pamahalaan at  lipunan.

 

Sek . 4.Naniniwala at naninindigan  ang samahan na nasa  pagkakaisa, pagtutulungan  , pag uunawaaan at sama samang  pagkilos  makakamit ang  anumang  mithiing nais makamit ng mga kasapi at samahan. 

 

SEK. 5. Naniniwala  at naninindigan  ang  mga kasapi ng samahan na ang uring  manggagawang kanilang  kinabibilangan  ay isa sa  mahalagang saray o sektor  ng lipunan  na dapat  bigyang  pagkilala , halaga  at pag ukulan ng  nararapat na  tulong o ayuda   mula sa pamahalaan , hindi lamang sa  panahon ng  kagipitan  kundi sa  lahat ng  pagkakataon at panahon.

 

 Sek. 6 .  Naniniwala at  naninindigan ang  samahan na  ang  kalayaan at karapatang  buuin ang kanilang  hanay  ay pandaigdigang  karapatan  ng mga manggagawa na ginagarantiyahn ng  pandaigdigang  batas  sa  paggawa .

 

SEK. 7. Naniniwala ,kinikilala at naninindigan ang   samahan  , na ang mapayapa at demokratikong  proseso ay mahusay na  pamamaraan sa pagreresolba  ng mga isyu, hidwaan  o di pag-uunawaan at iba pang usaping  may kinalaman interes, at kagalingan  ng  mga  , sa pagitan ng   kasapi at ng  namamahala/may ari ng  kumpanya  , ng ahensiya  ng  pamahalaan ,ng samahan  at iba pang organisadong  samahan sa KSA at sa Pilipinas.

 

SEK. 8. Naniniwala ang  samahan na ang  patuloy na  pag-aaral , pag aangat  ng  kamalayan  sa  sa mahahalagang gampanin ng  kasapi  , bilang  tao at  bilang  bahagi ng Lipunang  Pilipino  ay dapat  patuloy na bigyang  pansin ng samahan.

 

 SEK. 9.  Bilang  isang  organisadong samahan  , dapat  itaguyod  ng samahan ang  pantay at walang  kinikilingang  paglilingkod at pagtulong sa  mga kasapi at  ibang nangangailangan ng  tulong ayon sa abot ng  kakayayahan.

 

SEK. 10. Upang  makamit ang  layuning mabuo ang matatag na pagkakaisa , pagtutulungan , magandang  ugnayan sa  loob at labas  ng  samahan , maging ang  pagtitiyak sa  kapanatagan at kagalingan  ng  kasapi at samahan  , dapat  bumalangkas ang samahan  programa  , palatakdaan ng gawain at panuntunang  magtitiyak sa lahat ng ito.

 

SEK.11. Naniniwala  ang samahan  na ang  Estado ng  Pilipinas , ay  dapat  matiyak at magkaloob  ng  proteksyon sa  mga manggagawa  sa  ibayong dagat , pagkakapantay  pantay  ng  pagkakataon sa  paggawa o pagtatrabaho , anuman ang  kanyang  lahi o relihiyon .  dapat din matiyak  ng estado  ang maayos na  ugnayan ng  manggagawa sa ibayong dagat , makatarungan  pasahod at benipisyo at makataong  kalagayan sa loob  ng  paggawaan  o opisina   o pabahay ng  kumpanya.

 

 

Artikulo III  –Saklaw  ng Kapangyarihan

 

Sek 1.- Tanging ang  ganap na kasaping  manggagawang Pilipino sa Obeikan Investment Group   sa KSA ang saklaw  o sakop ng  kapangyarihan ng Saligang Batas na  ito at ng mga panuntunan binalangkas  , babalangkasin , ipinatupad  o ipatutupad .

 

 

Artikulo IV-Kasapian

 

 

Sek.1. – Ang  kasapian ng  OFWA ay bubuiin ng  mga Pilipinong Manggagawa sa alin mang  kagawaran , sangay  o kumpanya  ng Obeikan Investment Group  na  nagpahayag ng  kagustuhan, kahandaan at pagnanais na maging kasapi ng  kapatiran. Nakatira man sa  pabahay    ng kumpanya o hindi. 

 

Sek 2  Tungkulin , Pananagutan at Karapatan ng  Isang  kasapi

 

a. Tungkulin  ng   sinumang  kasapi ang  pangalagaan ang   magandang  pangalan at integridad  ng samahan sa lahat ng  oras   o  pagkakataon.

 

b. Tungkulin ng sinumang  kasapi ng samahan ang   dumalo at aktibong makilahok  sa  mga programa , gawain at pagpupulong  ng  mga kasapi.

 

k.Tungkulin  ng sinumang  kasapi ang aktibong isulong  ang layunin at  mga inisyatibang inilulunsad  ng samahan.

 d. Tungkulin  ng sinumang kasapi ang   sumunod o tumalima sa  panuntunan o disiplinang  ipinatutupad at ipatutupad  ng samahan.

 

e. Tungkulin  ng sinumang  kasapi ang  magbayad ng kaukulang  taunang “ membership  fee (50 SR ) “,regular na  butaw (dues )  5 SR /buwan  at iba pang kontribusyon na  pinagpasyahan ng kapatiran.

 

g. Tungkulin  at pananagutan  ng   sinumang kasapi na gampanan ang  responsibilidad o iniaatas na gawain sa kanya  ng samahan.

 

 h. Pananagutan  ng sinumang  kasapi ang anumang  pag-aari o pananalapi  na ipinagkatiwala sa  kanya  ng samahan.

 

i. Karapatan  ng sinumang  lehitimong kasapi ang manomina o mahalal sa alin mang  posisyon ng samahan .

 

l. Karapatan ng  sinumang  kasapi ang mapatalastasan sa  mga  programa, gawain at inisyatibang  ilulunsad ng  samahan   para sa kasapian  at  sa labas ng  samahan.

 

m. Karapatan  ng bawat kasapi na mabatid  ang kabuuang  kalagayan ng samahan, maging ang kalagayang pananalapi nito, matapos ang paglulunsad  ng alin mang gawain o termino o panunungkulan  ng  pamunuan sa  isang takdang panahon.

 

n. Sa lahat  ng  pangkalahatan o espesyal na  pulong na tinawag para sa   kasapian, karapatan ng bawat kasapi ang mapatalastasan at mabigyan ng sipi  ng katitikan ng  pulong  o pagtitipong inilunsad.

 

o. Naayon sa panuntunan, karapatan ng sinumang kasapi ang   magsuri ng mga ulat o dokumento ng  samahan.

 

p. Sa maayos na  paraan  o proseso , karapatan ng bawat kasapi ang   mag mungkahi , magpaabot ng  puna  o pagwawasto sa  alin mang maling tunguhin o tinatahak na direksyon, programa, panawagan o panuntunang  ipinatutupad  ng samahan .

 

r. Maykarapatan din ang sinumang kasapi na makilahok sa  mga  pangkalahatang desisyon o pagpasya na  kinakailangan at tinawag  para ditto.

 

s. Karapatan ng sinumang  kasapi  o ng  kagyat at lehitimong  pamilya  (kung ang  kasapi ay bawian ng buhay o mamatay  na aktibong kasapi ) ang magtamasa  , makinabang  o tumanggap ng  pribelihiyong ipinagkakaloob sa sinumang  kasapi  kung  mayroon at  itinatadhana  ng panuntunang binalangkas  at naayon sa  pribelihiyo at benepisyo ng isang kasapi.

 

t.  Karapatan ng sinumang ganap na kasapi na  tumangggap , magkaroon o pagkalooban ng   pagkakalilanlan ng pagiging kasapi ( ID) , sertipikasyon o katibayan ng pagiging kasapi  o anumang kinakailangang  patunay  ng kanyang  pagiging kasapi.

 

 

 

 

Sek  3 .  Pagtitiwalag  o Diskuwalipikasyon ng kasapi  .

Ang mga sumusunod na  kalalagayan   o kundisyon ay maaaring maging sanhi  ng  pagkawala  ng pagiging ganap na kasapi  o diskuwalipikasyon  o pagtitiwag sa isang kasapi:

 

  1. Magpasyang lisanin ang trabaho  o mag exit sa  alin mang kumpangyang saklaw  o bahagi ng Obeikan Investment group .
  2. Tinggal  ng  kumpanya sa  trabaho dahil sa  pagkalugi  o pagkabangkarote  o pagbabawas ng tao dahil sa  pagkalugi o pagbabawas  ng gastusin
  1. Itiniwalag ng  samahan dahil sa  paglabag sa  panuntunan ng samahan, ng  kumpanya  , ng batas ng Pilipinas  o ng Saudi Arabia.

 

 

Artikulo V - ANG  PAMUNUAN, TUNGKULIN , PANANAGUTAN , KARAPATAN  AT  KAPANGYARIHAN

 

Sek.1 . Ang  pamunuan  ng OFWA  ay bubuuin ng Over All Chairman, Vice –Chairman  ng  mga  kumpanyang sakop ng OIG, Kalihim, Ingat-yaman , Tagasuri o auditor, Tagapamayapa, at mga  Pinuno ng Lupon na  ihahalal  ng mga kasapi , sa paraang napagkasunduan  ng mayorya  sa isang partikular na araw na  ito ay tinawag at itinakda para ganapin ang  halalan.

 

Sek 2.  Ang pamunuan bilang  isang buong  organo  o katawan ay dapat   kumilos  ng sama-sama  ayon sa  layunin at mithiing itinakda  o pinagkasunduan ng  mayorya  ng samahan.

 

Sek 3. Ang Over-All Chairman , katangian o kuwalipikasyon ,tungkulin , pananagutan  at karapatan

            a. Bilang  pinakamataas na halal na pinuno , tungkulin niya  tingnan, pangalagaan at subaybayan ang  tunguhin , Gawain, programa  , kapwa  kasama  sa  pamunuan   at ang kabuuang  kaayusan ng  kapatiran ayon sa  layunin  at mithiing makamit  nito

 

            b. Tungkulin at pananagutan  din ng Over-All  Chairman ang  kumatawan sa samahan sa  mga  pulong, imbitasyon o gawain  kung saan  tinawag  o hiniling ang   presensiya o representasyon ng kapatiran .

 

            k. Tungkulin , pananagutan , karapatan  at kapangyarihan din nito ang ipatupad ang mga  programa, Gawain , inisyatiba at panuntunang binalangkas  ay  pinagtibay   ng pamunuan  o  ng kasapian, na laging may pagsasaalang –alang sa  pangalan , integridad , layunin at  mithiin ng  kasapian.

 

            d. Tungkulin , pananagutan, kaparatan at saklaw ng kapangyarihang ipinagkaloob sa Over-all Chairman ang magpalabas  ng mga kalatas  , ulat  o kumunikasyon para sa  lahat ng  kasapian , ibang organisasyon , institusyon pribado man o publiko  na  kinakailangan at makabubuti sa  samahan at kasapian  nito.

 

            e. Tungkulin , pananagutan, karapatan at saklaw din  ng kapangyarihan  ng Over-all chairman ang  lumagda sa  mga  ulat , dokumento at kauri nitong may  kinalaman sa  samahan.

 

            g. Tungkulin , karapatan  , saklaw ng  kapangyarihan   at pananagutan  din ng Over-All Chairman ang magmungkahi, mag rekomenda  ng mga panuntunan , programa at inisyatibang  makabubuti sa   kasapian at kapatiran.

            h. Tungkulin ,karapatan , pananagutan   din ng  Over All Chairman  ang gumanap ng iba pang tungkulin pinagpasyahan ng   mayorya  ng  pamunuan  o ng kasapian.

 

Sek. 4. Ang  Vice-Chairman  -Katangian, kwalipikasyon, tungkulin at Karapatan

 

a.       Sa halalang  pampamunuan, ang  kasapian ay dapat maghalal  mula sa  mga  nominadong  kasapi ng tatayong PangalawangTagapamahala  o Vice chairman na kakatawan sa  ibat-ibang  kumpanya sa  ilalim ng OIG.

b.      Hanggat maaari , ang dapat na mahalal na V-Chairman  ay  may pagpapahalaga at komitment sa kapakanan ng  mga kasapi .may kakayahang magpasunod ,kinikilala at iginagalang ng mga kasamahan.

c.       Tungkulin, pananagutan at karapatan ng mahahalal  ang panguluhan o pamunuan at ibat-ibang  lupon na  bubuin sa loob ng  samahan.

d.      Tiyakin may  programa at sistemang sinusunod sa  paglulunsad  ng gawain ng Lupong kanyang  pinamumunuan tungo sa  pagkakamit ng layuning nais marating.

e.       Sa panahong wala  o hindi makagampan ang Over all -Chairman , mula sa mga nahalal na chairman sa isang espesyal na  pagpupulong pipili  ng pansamantalang  gagampan ng  tungkulin  o pananagutan ng Over-All chairman, taglay ang gayundin, tungkulin, pananagutan at  karapatan.

f.        Tungkulin , pananagutan at karapatan ng Vice Chairman ang aktibong  lumahok at makiisa sa mga pulong , gawain , programa at inisyatiba  ng  samahan.

g.      Tungkulin at pannagutan din niya ang magsumite ng kinakailangan  ulat ng samahan sa lupon  o gawaing  kanyang  dinaluhan  o inilunsad.

h.      Tungkulin , pananagutan at karapatan din ng isang Vice chairman ang gumanap ng iba pang tungkulin ayon sa  kahilingan, kalagayang  umiiral o pangangailangan  at  pagpapasya ng  mayorya  ng pamunuan o ng kasapian.

 

Sek .5. Kalihim- Katangian,kwalipikasyon  , Tungkulin , Pananagutan at Karapatan

 

a.  Ang  samahan sa  pamamagitan ng  opisyal na halalan ay  pipili  o maghahalal ng isang  Kalihim , na magmumula sa   alin mang  kumpanya  ng OIG.

 

b. Hanggat maaari , ang  ihahalal na  kalihim ay dapat marunong  gumamit ng  computer, may kakayahang  gumawa ng ibat-ibang  uri  sulat o liham, kumalap ng  impormasyon, may kasanayan sa  pakikipag usap  o pakikipagtalastasan sa mga kasapi  at may organisadong sistema  ng  pag iingat ng  dokumento ng  samahan.

k. Hanggat  maaari ang  ihahalal  na kalihim ay may kakayahang magsalita, magbasa at magsulat sa  wikang Inglis .

d. Tungkulin  ng maihahalal na kalihim ang  kumuha  ng tala o katitikan  ng   mga  pagpupulong, mahahalagang  impormasyon  tungkol sa  mga kasapi  at iba pang  impormasyong mahalaga  sa  samahan at kasapian.

e. Tungkulin  ng kalihim ang pagkakaroob ng organisado at sistematikong  paraan ng pag iingat , pagtatala at pag papaunlad ng mga   dokumentong nasa kanyang   pag iingat.

                                             ( 6 )

 

g. Tungkulin at pananagutan  ng   Kalihim ang  magpadala  ng kalatas  , paanyaya  ,liham pangkabitiran  o anunsiyo sa  mga  kasapi sa  mga pagpupulong  o gawaing  kinakailangan ang kanilang  pagdalo o pakikilahok.

 

h. Sa  pakikipag ugnayan sa  iba pang  pinuno ng samahan, tungkulin at  pananagutan  ng kalihim ang mangalap ng  ibat-ibang ulat , tala  o dokumento sa   mga gawaing  inilunsad  , dinaluhan  ng kasapi o pinuno , ginugulan ng samahan at kauri  nito.

 

i. Tungkilin , pananagutan at karapatan ng Kalihim ang  magsuri , mag  mungkahi ng  pagbabago  o pagpapalit  upang iwasto  o itama ang  mga ulat at talang  isusumite sa  kanya  ng mga  kasapi o pinuno sa lahat ng  pagkakataon.

 

l.Tungkulin at karapatan ng Kalihim ang aktibong  lumahok sa mga pagpupulong , pagbuo  ng plano, gawain , programa at panuntunan na makapagpapaunlad sa samahan.

 

m. Sa  panahong  mawala , magbitiw   o  pumanaw  ang   Chairman, at Vice Chairman,   tungkulin, pananagutan at karapatan ng Kalihim na tumayo, pansamantalang  humalili  at gumanap   ng kanilang  tungkulin  , habang  hindi  pa napipili  o napagbobotohan ang  papalit sa  kanila.

 

n. Tungkulin , pananagutan at karapatan ng Kalihim ang dumalo at aktibong makilahok sa mga pagpupulong , gawain , proyekto at inisyatibang  ilulunsad  , lalahukan o dadaluhan ng samahan .

 

Sek. 6. Ingat-Yaman , Katangian, Kuwalipikasyon, Tungkulin, Pananagutan at Karapatan

a.       Sa halalang pampamunuan  gaganapin , ang kasapian ay maghahalal din  o pipili  ng sa palagay nila ay karapat dapat maging  Ingat-yaman ng  samahan.

 

b.      Hanggang maaari isang  kasaping  may karanasan sa  ganitong  posisyon  o kasanayan ang mahalal o mapili 

 

k.        Bilang  halal na  pinuno, tungkulin at  pananagutan  ng  Ingat-yaman  ang mahusay na  paghawak at pag –iingat ng  kayamanan  at pag-aari ng samahan.

 

c.       Bilang Tagapangulo ng Lupon sa Pananalapi  , kasama  ng iba  pang  pinuno , tungkulin  at pananagutan ng Ingat-yaman ang pagbuo ng  pangkalahatang  gugulin o badyet , pagbalangkas  ng  Programa at  partikular na  panuntunan sa  paglalabas ,paggugol at pagpasok  o pagsasampa  ng  pondo at pag-aari ng samahan.

 

d.      Panguhaning tungkulin, pananagutan at karapatan ng Ingat-yaman  kasama ang  mga Tagasuri  na magtiyak ng maayos na daloy ng badyet  o pananalapi ng samahan , ginugugol  ng ayon sa  pangangailangan at pinagpasyahang  gawain, proyekto at gastusin ng  kapulungan o samahan.

 

 

e.       Bilang  isa sa  lalagda ,tungkulin , pananagutan at karapatan ng Ingat yaman , sa  pagpapasya ng mayorya na ilagak  ang  pera ng samahan sa  isang   institusyong pinansiyal . At  ilabas  ito ayon sa  programa at pangangailangan ng samahan.

 

g. Tungkulin at  pananagutan  ng Ingat –yaman ang  regular na mag palabas  ng ulat sa  katayuang  pampinansiyal  ng samahan, gayudin sa  mga pagkakataong  hingan  o kailanganin  ito. Ang mga  ulat  bago ipalabas ay dapat nasuri at pinagtibay ng  mga  tagasuri ng  samahan.

 

i.        Tungkulin , pananagutan at karapatan ng Ingat-yaman ang  humingi ng katibayan -patunay  sa  lahat  ng   mga  gugulin , paglalabas , pagsasampa  ng  pondo sa  samahan.

 

l.         Tungkulin at karapatan ng ingat-yaman ang  aktibong lumahok sa mga pagpupulong , pagbuo ng plano , gawain at panuntunang  makapagpapaunlad sa samahan.

 

m.     Tungkulin , pananagutan at karapatan ng  Ingat-yaman ang gumanap ng iba pang tungkulin  iniatas sa kanya  ng  samahan  o ng  pamunuan.

 

Sek.7. Tagasuri o Awditor, Katangian , Kwalipikasyon, Tungkulin, Pananagutan at Karapatan

a.       Sa halalang  pamunuan  , maghahalal o pipili ng  2  Tagasuri ang  kasapian , na kukunin  sa mga   nominado na  nakapagtala ng  pinakamaraming  boto.

 

b.      Hanggat maaari ang dapat mahalal na  tagasuri ng samahan ay nagtapos ng  kursong malapit sa uri ng  tungkuling gagampanan niya.

k.  Bilang halal na  tagasuri, tungkulin , pananagutan at karapatan nito ang mahusay  at maayos na paggugol, at pagsasampa  ng  pondo ng samahan.

 

    d. Tungkulin din at pananagutan ng tagasuri ang  patuloy na pagsusuri at pagpapalabas  ng  ulat  pinansiyal ng samahan matapos ang isang takdang  panahon kinailangan ang kanilang  pagusuri.

     e. .Kasama ng Ingat –yaman  , gumanap ng mahalagang papel sa Lupon sa Pananalapi sa lahat ng gawain, proyekto ,program at inisyatiba  ng samahan.

 

g. Tungkulin at pananagutan  din ng tagasuri ang  magtiyak  na  maayos , organisado at sistematikong  paglalabas  o pagsasampa  ng pondo sa  samahan.

 

h.      Tungkulin at karapatan ng mga tagasuri ang  aktibong  lumahok sa pagbabalangkas ng plano, badyet , panuntunan at  gawaing makapagpapaunlad sa samahan at kasapian.

i.        Tungkulin at  pananagutan  ng tagasuri ang  gumanap ng  iba  pang   tungkuling iniatas  o iiaatas sa  kanila  ng samahan at pamunuan .

 

 

 

 

 Sek .8. Pinunong Tagapagkasundo at Tagapagpanatili ng Kaayusan- Katangian ,Kwalipikasyon, Tungkulin, Pananagutan at Karapatan

 

a.       Tulad din  ng  ibang  posisyon sa  pamunuan , sa araw  ng halalan , ang kasapian ay kinakailangang mag halal  o pumili  ng 3  o mahigit pang bilang  ng Pinunong Magtitiyak ng  Kaayusan at Magandang ugnayan ng kasapian.

 

b.      Kinakailangang may matatag na paninindigang  ipatupad ang narararapat na   disiplina  at kaayusan sa  loob ng samahan , maging sa panahon ng  mga gawin  at pagtitipon ng samahan.

 

k.. Tungkulin, Pananagutan at karapatan ng  mga Pinunong tagapagkasundo at  tagapag ayos ang magpanukala , lumahok sa  paggawa  ng mga pandisiplinang hakbang   o pagwawasto sa  mga  kasaping nakagawa ng  paglabag sa panuntunan ng samahan at batas ng  lipunan sa KSA at sa Pilipinas,lalo nat ito ay nakakaapekto sa  iniingatang pangalan ng samahan.

 

d.  Tungkulin at pananagutan ng mga pinunong  ito ang  dumalo ng regular sa  mga pagpupulong, pagtitipon at gawaing  inaasahan at kailangan ang kanilang  presensiya   at pakikiapahok.

 

e.. Tungkulin ,pananagutan at karapatan ng  mga  pinunong nahalal na  magsuri at  ipatupad  ng walang pasubali ang mga panuntunan at pandisiplinang hakbang na  ipinatutupad  ng samahan  para sa mga kasapi.

 

g.. Tungkulin , pananagutan at karapatan din ng mga  nahalal na  pinuno ang  dumalo o kumatawan sa samahan  sa  mga  pagtitipon  na  kinakailangan ang kanilang pakikilahok .

 

h.. Tungkulin, pananagutan at karapatan ng  mga halal na  pinuno na  pamunuan ang Lupon sa Kaayusan at Kapayapaan ng samahan.

 

i.. Tungkulin, pananagutan at karapatan din nila ang gumanap ng ibang pang tungkulin sa samahan , ayon sa  pasya  ng mayorya  ng  pamunuan  o ng kasapian.

 

 

Artikulo VI– Halalan ng Pamunuan At Haba ng Panunungkulan

 

Sek 1. Ang Halalang Pampamunuan ng kapatiran ay  itatakda  o magaganap sa  Unang  Huwebes   o Biyernes    Enero , ng susunod na  taon ng huling taon ng    panunungkulan  ng kasalukuyang    pamunuan.

 

Sek 2. Ang  lugar at panuntunan sa  gaganaping  halalan  ay ipaaabot sa  kabatiran ng lahat  sa paraan sa pamamagitan ng  email , pagpapaskil sa  mga  villa at iba pang kapamaraanan .

 

Sek.3. Upang matiyak ang maayos at malinis  na halalan ng susunod na pamunuan, bubuo ng Adhoc na Komite sa Halalan   na siyang mangangasiwa  sa gaganaping  botohan. Ito ay  bubuuin ng  5 -7 katao na   pinili ng kasapian.

 

Sek.4.  Ang lahat  ng  pinuno , sa pamamagitan ng   pagpili o pagboto ng  mga kasapi ay  pinahihintulutan ang  re eleksyon o hanggang  nanatili ang  tiwala, kumpiyansa at nakikitang epektibo  o mabisa ang  pamumuno ng isang  opisyal ng samahan.

 

Sek.5. – Walang sinumang  kasapi ang mahahalal  o manonomina  sa alin mang posisyon na wala sa kapulungan  kung saan  ginaganap ang halalan.

 

Sek.6. Ang pagsasalin  at panunumpa  ng bagong halal na pamunuan ay magaganap sa ikatlong Huwebes  o Biyernes  ng Enero kung kailan ginanap ang  halalang pampanunuan.

 

Sek. 7 – Ang lahat ng  pamunuan , maging ang mga  pinuno ng  lupong  bubuuin at mga espesyal na  posisyon na  bubuuin ay manunungkulan sa  loob ng   2 taon.

 

Sek. 8. Pinahihintulutang muling  tumakbo o mahalal ang sinumang  pinuno  sagyung ding  posisyon o pwesto , maliban nalamang  kung madiskuwalipika dala  ng  paglabag sa mga panuntunang itinakda sa halalan at panuntunan ng samahan.

 

 

 

Artikulo VII. – KARAPATAN SA HALAL

 

Sek.1.  Ang karapatan na ihalal o mahalal sa  mahahalagang posisyon sa  samahan ay karapatan ng  lahat ng kasapi nito. Maliban na lamang  na sa  kung araw na  ito ay ginanap ay liban o wala  ang kasapi o winalan siya  ng karapatan  sa pagboto  o maiboto  dala ng paglabag sa   panuntunan at disiplinang  ipinatutupad  ng samahan.

 

 

Sek. 2. Ang Lupon o Komite sa Halalan bago ang takdang araw  ng halalan  ang siyang  babalangkas ng isang sistema sa pagdaraos  ng  halalan  upang matiyak ang maayos at malinis ito.

 

 

ARTIKULO VIII  - PANANALAPI AT  PAG-AARI NG  KAPATIRAN

 

Sek. 1.  Ang papanalapi  o pondo ng  OFWA ay magmumula sa  membership  fee , regular na  butaw , donasyon , gawaing pagsasampa ng  pondo   at iba pang  legal na paraan ng pagkukunan nito.

 

Sek .2. Ang  pondo  ng kapatiran ay tanging sa  opisyal na  gawain , proyektong  pangkawang gawa o pakikipagkapwa tao   , pribelehehiyo  at benipisyo ng mga kasapi  ilalaan  o gugugulin ayon sa  itinakdang panuntunan  para sa pagugol nito.

 

Sek.3. Ang lahat  ng  paggugol o gastusin ng samahan ay dapat  sang ayon  o naaayon sa  partikular na  panuntunang  itinakda para ditto.


Sek. 4. Bilang pangkalahatang  panuntunan , anumang guguling  para sa samahan ay dapat  bigyan ng kaukulang katibayan  o resibo na magpapatunay na  lehitimo ang pagkakagastos  nito.

 

Sek. 5 . Ang  lagda  ng  Chairman , Ingat –yaman at ng  mga tagasuri ay  kinakailangan sa anumang  pagpapasok at paglalabas ng  pondo  ng samahan.

 

Sek. 6. Ang Ingat –yaman  kasama  ang mga Tagasuri o awditor  ay dapat regular na  magpalabas  ng ulat matapos  ang isang  opisyal  na gawain   ,bukod pa sa  yugto yugtong (periodic)  pag-uulat ng  kalagayang  pinanisyal ng  samahan.

 

Sek. 7 . Ang pondo ng samahan  ay  ilalagak  o I deposito  sa  ngalan ng  samahan   sa isang bangkong  napagkasunduan ng  mayorya ng kasapian.

 

Sek. 8 . Ang  lahat ng bagay o materyales  na nabili simula  sa  pormal na  pagkakatatag at pagkakaroon ng pagkilala o akreditasyon  ng Embahada  ng Pilipinas  ay mananatiling  pag-aari ng kapatiran   na  ,iingatan ng  Ingat-yaman o pinunong  napagkasunduang magsinop o mag-ingat nito.

 

Sek. 9 .Lahat ng  pag aari  ng kapatiran ay kinakailangang  iulat o imbentaryo , panapanahon at ipabatid sa  lahat ang kalagayan nito.

 

 

ARTIKULO IX – BENIPISYO NG   MGA KASAPI

 

Sek. 1. Itinatakda  ng bahagi  ito ng Saligang Batas   na lahat  ng  lehitimo oregular na kasapi ay may karapatang  tumanggap ng   benipisyong  ipinagkakakoob ng samahan  sa lahat ng kasapi matapos na  ito ay makapagbayad  ng  kaukulang  membership fee.

 

Sek. 2 .Tulong sa   Pagkasawi  ,pagpanaw   o tuluyuang pagkabalda  ng kasapi  – Ang sinumang kasapi na namatay   o tuluyang nabalda o nawalan na ng kakayahang  maghanap buhay   habang siyang ay ganap na kasapi ay may karapatang   tumanggap  na kaukulang  tulong  mula sa  samahan na  itatakda sa espisipikong  panuntunang babalangkas para ditto.

 

a.       Kung ang namatay na kasapi ay may  lehitimong  asawa , sa asawa  ito ipagkakaloob  at kung  wala na ring asawa sa  isang lehitimong anak ito ipagkakaloob.

 

b.       Kung ang nasawi o nabaldang kasapi ay binata at wala ng kakayahang tumanggap ng benipisyo na aktuwal , ang magulang   o sa isang  lehitimong kapatid  ipagkakaloob  ito.

 

 

 

 

 

 

 

 

Sek. 3.  Tulong sa Pagpanaw  ng Kagyat na Miyembro ng Pamilya  ng Kasapi.

 

a.             Sa pagkamatay ng asawa, anak at magulang  , ang samahan  sa  isang espisipikong  panuntunan ay magtataka ng halagang  ipagkakaloob ng samahan  bilang tulong o benepisyong kailangan  matanggap ng usaoing ito.

 

b.      Sa pagkamatay  ng kapatid , ang samahan ay magkakaloob din  ng tulong  pinansiyal oo benipisyong  laan at kailangang  matanggap ng sinumang  kasapi.

Sek 4.  Tulong  sa Biktima  ng Kalamidad- Ang sinumang  lehitimo  o ganap na kasapi  na naging biktima  ng  kalamidad ay may karapatang tumanggap  ng  tulong  pinansiyal  mula sa samahan.

 

Sek. 5 Ang  lahat ng  benipisyong ipagkakaloob sa sinumang kasapi at dapat dumaan sa masusing pagsusuri at  nangangailangan ng mga patunay o dukumentong  susuporta sa benipisyong dapat matanggap ng isang kasapi mula sa samahan.

 

Sek  6.  Ang lehitimong asawa , anak  o pamilya   ay ang orihinal na asawa,anak  o pamilya  , ng kasapi. Legal , kinikilala  ng bawat  partido  at ideneklara sa  opisyal na membership form ng  kasapi

 

Sek .7. Regalo o Alaala sa Kaarawan at  Kasal- Ayon sa  kakayanan o kalagayang  pinansiyal  at pagpasyahan ng mayorya

 

Sek .8 Boluntrayong tulong sa  dating kasapi  na  Samahan na pumanaw   o nawalan na ng kakayahang  maghanap buhay . Sa  isang espesyal na  pulong  na tatawagin , maaaring  pagpasyahan  ang pagkakaloob ng  boluntaryong tulong sa isang  dating kasaping pumanaw  o tuluyan ng nabalda o nawalan ng kakayahang maghanap buhay.

 

Sek. 9.Inaaalisan  o mawawalan ng  karapatan , benipisyo o pribelehiyo ang sinumang kasapi na  nahatulan   o napatunayang  lumabag sa Saligang Batas  ng samahan   ,  batas  ng Saudi Arabia  o ng Pilipinas.

 

Sek.10. Ayon sa kalagayang  pampinansiyal ng samahan, bukod sa  mga nabanggit , maaari pa ring  magkalooob ng ibang anyo o porma  ng  tulong sa  mga kasapi  nito ayon sa  pasya ng mayorya.

 

 

 

 

 

 

 

 

 

 

 

 

ARTIKULO  X – ANG MGA  LUPON  O KOMITE NA  BUBUUIN

 

Sek .1 . Ang  OFWA  sa  ilalim na  Saligang  Batas na  ito ay  bubuo ng   mga Lupong makakakatuwang  ng pangkalahatang pamunuan sa pamamahala at  pagpapatakbo ng samahan.

 

Sek . 2.  Ang Lupon na  bubuuin ay ang mga sumusunod:

 

a.       Lupon sa  Pag-aaral/ Pananaliksik /Dokumentasyon  - Dapat  linawin na hindi lamang ang  mga mag-aaral sa paaralan ang dapat mag-aral kahit maging ang mga  manggagawa  o ordinaryong tao sa alin mang samahan ay dapat patuloy ang  pagpapalalim ng kanilang kamalayan  o kamulatan sa  tunguhin , layunin  at lahat  ng bagay na may kinalaman at magpapaunlad sa kanilang samahan.

1.       Pangunahing tungkulin o gampanin ng  Lupon ang  bumalangkas  kasama ang  pangkalahatang pamunuan ng isang pang mahabang panahon na  programa  ng pag-aaral  ,kasama na ang  mga kasanayang dapat matutunan ng mga namumuno, at kasapian sa  lahat ng aspeto.

2.       Kasama sa  mga  ito ang  paggawa ng badyet,magtukoy ng mga magbibigay at tatanggap ng pagsasanay o pag aaral .

3.       Tungkulin din at pananagutan ng   Lupon ang   patuloy na  pagsasaliksik , pag iingat  at pagkakaroon ng isang organisadong sistema ng  pag uulat at  pagsisinop ng  mga dokumento o kasulatang  may kinalaman sa samahan .

4.       Maging ang   promosyon  o pagpapakilala ng samahan ay tungkulin  o saklaw  ng lupong ito..

5.       Sa mga  gawain, pagtitipon  o pagsasanay , pangunahing  ang mga  kinatawan ng Lupon na  dumalo  o kumatawan sa mga  ito.

 

b.      Lupon  sa Pananalapi at Kabuhayan – Walang samahan sa  daigdig ang   umunlad at nagtagumpay ng walang  pagsasaalang –alang sa pananalapi o kabuhayan ng samahan. Kung  kayat  bubuuin ang Lupon  na  ito upang matiyak ang matatag na sistema ng paghawak ng pondo ng samahan  at gawaing pagsasampa ng pondo.

·        Ang Lupon din ang pangunahing  may kinalaman  , kikilos o babalangkas  para sa anumang  proyektong  pangkabuhayan ng samahan sa Pilipinas  man o sa Saudi Arabia na mapagpasyahan ng samahan.

                          

k..  Lupon sa Kaayusan at Disiplina- Ang Lupong ito ang pangunahing may kinalaman sa  pagpapanatili ng  kaayusan , disiplina at mahusay na sunuran ng mga  kasapi sa lahat ng pagtitipon at gawain  nito. Kasama  ng  Pamunuan  , ipatutupad ng    lupon  ang anumang panuntunan  o pandisiplinang  may kinalaman s apag-aayos ng ugnayan at disiplina ng   mga kasapi sa lahat  ng panahon at pagkakataon.

 

d.. Lupon sa Paggawain  o Proyekto – Ang  lupong ito ang pangunahing  may kinalaman sa  mga ilulunsad na gawain proyekto  ng samahan hinggil sa  kabuhayan o negosyong papasukin ng samahan  kung dumating ang  pagkakataong   umunlad o magpasya at pagkasunduan ng mayorya.

 

e.. Lupon sa Palakasan at Kalusuagan – Ang lupong ito ang  pangunahing babalanagkas  , mangunguna at  magsasaayos ng mga gawaing pampalakasan at pangkalususgan ng kasapian at  pakikilahok  ng  samahan sa  labas ng  samahan.

 

g. Lupon sa  Kasiyahan at paglilibang  - Pangunahing  gawain nito na   pagtuunan ng  pansin ang  pagpapaunlad  ng  mahusay ugnayan o relasyon ng bawat kasapi sa isat-isa.

Sa partikular,pangunahing  tungkulin o gampanin ng   lupon ang  mga programa, panuntunan sa mga gawaing  paglilibang ang pangkasiyahan ng samahan .

 

h.. Lupon sa Kasapian  at Mahusay na Pamamahala o Pagpapatakbo ng Samahan-

Kasama  ang pamunuan ,pangunahing tungkulin ng lupong  ito ang  pagsasala o pagsusuri  sa mga  Pilipinong sasapi  sa samahan  at  magtiyak ng mahusay na  pagpapatakbo  o pamamahala  ng  mga  namumuno sa  samahan.

 

Ang Lupon ding ito ang tatayong mata , bibig at tainga  ng samahan sa lahat ng  pagkakataon.

 

i.. Lupon sa Gawaing Pangpamayanan  at Panglipunan  - Ang lupong ito ang pangunahing  may kinalaman  sa mga  proyekto , gawaing  pakikipagkaisa  ng samahan sa  pamayanan, ibang  organisadong samahan, institusyon ,pribado man o publiko, at ugnayang panlabas  ng samahan, sa KSA at sa Pilipinas .

 

l.. Lupon sa Halalan – Ang  pangunahing may kinalaman sa   halalang gaganapin sa  samahan sa mga takdang panahon  o  pangangailangan. Sa  mga  usapin, panuntunan at pagsasaayos ng sigalot , hidwaan  ,katanungan o paghahabol sa  naganap na halalan,  ang Lupon din sa halalan ang may karapatan  at unang mananagutan sa  samahan.

 

m.Espesyal o Ahdoc Committee/s – Sa isang  takdang panahon , ang  pamunuan kasama ang mayorya  ng lupon ay  pinahihintulutang magbuo ng  iba pang  lupong   kakailanganin ang mga  ito  bukod sa mga regular na  lupong nabuo na.

 

 Sek. 3. Ang   lahat ng  maitatalaga  o mahahalal sa  bawat lupon na  pinuno o kasapi ay manunungkulan din  sa haba  ng  panahong ipinagkakaloob sa  mga regular  na  pinuno ng samahan  .

 

Sek .4.  Lahat ng Lupon  kasabay ng  pangkalahatang  pamunuan ay siyang mananagutan  o  may tungkulin  bumalangkas  ng isang  pangkalahatang  programa, badyet , panuntunan at palatakdaan ng gawain  para sa  samahan ayon sa  napagkaisahang  tunguhin  o layunin ng samahan.


Sek. 5  Ang Lahat ng  lupon ang siyang may kinalaman  sa  pagbalangkas  ng mga  partikular na  panuntunan sa  mga  proyektong kanilang ilulunsad.

 

Sek .6. Ang lahat ng Lupon , maliban sa  Lupon sa Pag-aaral, Pananalapi  at Kasapian ay pamumunuan  ng mga nahalal na Vice Chairman ,na maghahalal ng kani kanilang Lupong hahawakan at kasapian.

 

ARTIKULO X1 – SUSOG O MGA  PAGBABAGO SA SALIGANG BATAS

 

Sek.1. Anumang susog  o pagbabago sa alin mang bahagi ng saligang  batas na  ito ay maaaring maganap  o mapagtibay  sa kahilingan ng mahigit sa  kalahating  bilang ng  buong  kasapian  sa isang  espesyal na  pulong na  tinawag para ditto.

 

Sek 2. Sa  pamamagitan ng   isang pormal na kahilingan  kung  saan, nakasaad ang  bahagi o probisyon na nais baguhin  gayundin ang  mungkahi  pagbabago , ang anumang pagbabago  o susog ay maaaring  maganap , matapos  na mapag-usapan sa  kapulungan  at  makapangalap ng  pagsang-ayon   ng mahigit  kahating bilang ng  kasaping  lumagda sa  pagbabago  o pagdaragdag .

Sek . 3  Dalawang  linggo matapos maisumite  ang  kahilingan  o susog na pagbabago itatakda ang  pagdinig  o pagpupulong para sa   probisyon o bahagi ng Saligang Batas na  gustong baguhin , amyendahan  o palitan.

 

Sek . 4. Isang  Linggo  matapos na makalap at malagdaan ng mahigit sa  kalahating kasapi ng  kapatiran , ang   probisyon na  pinalitan ay magkakabisa o ipatutupad .Gayundin ang  bahagi  o probisyong pinalitan ay mawawalan ng  bisa.

 

 

ARTIKULO  XI1- PAGTITIBAY , RATIPIKASYONAT  PAGKAKABISA


Sek. 1.
Sa isang  petsa  o araw na  itatakda ang  Saligang batas na ito  ay pagtitibayin ng  mga ganap na kasapi ng samahan sa pamamagitan ng pasya ng  mahigit sa  kalahati ( ½ plus 1) ng mga kasaping dumalo sa   pulong o botohan.

 

Sek.  2 .Pinagtitibay at magkakabisa  ang Saligang Batas na  ito ngayong ika- ____ng ______________, 2009, .

.

.

OBEIKAN FILIPINO WORKERS LINKS

 
 
 
 
 
 
EMAIL US  :  ofwa_ksa@hotmail.com